TAGBILARAN CITY, Bohol, July 4 (PIA) -- Upat ka gatus pa ug kawaloan ug duha ka barangay sa Bohol ang wala pa mapalingkawas sa mga tinugyanan sa balaod sa hulga sa illegal nga drugas.

Ug sa 56.33% nga nahibilin, nagkadaku ang hulga tungod kay sa dili madugay, ang paglihok sa mga katawhan sa eleksyon ug pagpuli og mga bag-ong lider, mahimong may dakung epekto sa paspas nga pagpalingkawas sa mga komunidad sa kumot sa illegal nga drugas.

Segun sa taho gikan sa Kampo Dagohoy, ang base sa Philippine National Police (PNP) dinhi sa lalawigan sa Bohol, 627 pa ka barangay sa tibuok Bohol ang naluwas na sa hulga, bisan pa nga walay bisag us aka barangay ang nabahig sa may grabe nga hulga sa drugas.

Segun sa kapolisan, sa 627 ka barangay nga napalingkawas na, 348 niini ang medyo apektado sa illegal nga drugas samtang 262 ang moderately affected.

Tungod niini, may 482 na lamang ka barangay sa Bohol ang lihukonon pa sa Regional Oversight Committee, ang interagency nga bahan sa mga tinugyanan nga maoy makadeklara nga ang usa   ka lugar, luwas na sa drugas.

Sa nahibilin nga mga barangay, 246 niini ang medyo apektado na sa illegal nga drugas samtang may 236 usab ka barangay ang kinahanglan pang luwason sa pagka moderately affected sa makahungog nga drugas.

Samtang napagawas sa Bohol Poll nga gihimo sa Holy Name University Center for Research and Publications nga 34% sa mga Bol-anon ang wala magtuo nga suliran ang illegal nga drugas dinhi.

Ming-abut hinuon sa 39% ang mingtuo nga seryoso ang suliran sa illegal nga drugas apan may 22% usab nga kini nga suliran, dili seryoso, samtang 4% lamang sa mga Bol-anon, matud pa sa HNU Bohol Poll, ang mituo nga seryoso gyud ang suliran sa illegal nga drugas. (RAHC/PIA-7 Bohol)