TAGBILARAN CITY, Bohol, July 18 (PIA) -- Ang administrasyon ni Presidente Ferdinand Marcos Jr. nilusad sa ‘Bagong Pilipinas’ nga kampanya isip tatak niini sa pagdumala ug pagpangulo, nga gihulagway nga usa ka prinsipyo, tulubagon ug kasaligan nga gobyerno.

Sa tulo ka pahina nga Memorandum Circular 24 nga pinetsahan og Hulyo 3, 2023 ug gilagdaan ni Executive Secretary Lucas Bersamin, ang Presidente mimando sa tanang ahensya sa nasudnong gobyerno (NGAs) ug instrumentalities, lakip na ang government-owned or controlled corporations (GOCCs) ug state universities and colleges (SUCs) , sa pagsagop sa ‘Bagong Pilipinas’ nga kampanya sa ilang mga programa, kalihokan ug proyekto.

Ang tatak nga ‘Bagong Pilipinas’ nga aduna nay aprobado nga logo, mahimong kabahin sa branding ug communication strategy sa gobyerno sa administrasyong Marcos.

Ang Pangulo nagkanayon nga ang ‘Bagong Pilipinas’ mao ang nag-unang tema sa tatak sa administrasyon sa pagdumala ug pagpangulo nga nanawagan alang sa usa ka lawom ug sukaranan nga pagbag-o sa tanan nga sektor sa katilingban ug gobyerno, ug nagpasiugda sa pasalig sa gobyerno sa pagkab-ot sa komprehensibo nga mga reporma sa palisiya ug hingpit nga pagkaayo sa ekonomiya.

Ang ‘Bagong Pilipinas’ gihulagway ni Marcos isip usa ka prinsipyo, tulubagon ug kasaligan nga gobyerno nga gipalig-on sa hiniusang mga institusyon sa katilingban nga adunay tumong nga matuman ang mga tumong ug pangandoy sa matag Pilipino.

Ang tatak nga ‘Bagong Pilipinas’ kabahin usab sa bid ni Marcos sa pagkapresidente atol sa 2022 nga eleksyon. (ECB/PIA7-Bohol)