MANILA, August 16 (PIA) -- Gi-aprobahan ni Presidente Ferdinand R. Marcos Jr. ang sugyot nga Labor and Employment Plan (LEP) 2023-2028 nga nagtinguhang magmugna og mas daghang de-kalidad nga trabaho alang sa mga Filipino.
Ang LEP 2023-2028 unang gi-presentar kang Presidente Marcos niadtong niaging semana.
Tumong sa LEP nga kunhoran ang unemployment ug sulbaron ang underemployment og mas maayo nga trabaho.
Gibanabanang kapin sa 3 milyong trabaho ang mamugna ubos sa LEP taliwala sa planong implementasyon sa Department of Public Works and Highways (DPWH) nga 70,000 nga mga dagko ug gagmay nga infrastructure projects ubos sa “Build Better More” program.
Samtang gitan-aw usab sa Department of Labor and Employment (DOLE) ang “100 percent” nga budget nga gamiton sa pagtapos sa 2023.
Giingong sulayan sa departamento nga gamiton ang tanang budget allocation niini sa dili pa ang buwan sa Setyembre ning tuig.
Ang DOLE apil sa mga ahensya sa gobyerno nga maatubang sa budget cuts sa 2024 tungod sa “low budget utilization rate.”
Una nang gipahayag ni DOLE Kalihim Bienvenido Laguesma nga gimanduan ni Presidente Marcos ang tanang ahensya sa gobyerno nga hingosgan ang spending o paggasto sa mga programa sa social protection nga adunay tumong nga pagpangandam alang sa mga trabahante sa Pilipinas alang sa pagbukas pa sa ekonomiya sa nasud ug gipaabot nga pagdagsa sa mga foreign investors. (ECB/PIA7-Bohol)
