TAGBILARAN CITY, Bohol, Sept. 6 (PIA) -- Gipasalig ni Bise Presidente ug Department of Education (DepEd) Kalihim Sara Duterte niadtong Martes sa mga magtutudlo sa publikong eskwelahan nga hatagan sila og 30-straight rest days atol sa school break karong academic year 2023-2024.
Atol sa kick-off ceremony alang sa National Teachers’ Month sa syudad sa Tagbilaran, si Duterte niingon nga usa ka memorandum ang gitakdang ipagawas kalabot niini.
“We made sure that in this year’s school calendar, teachers will have 30 straight days of rest during the break without any DepEd activity that requires volunteer works. All activities with voluntary participation is scheduled after the said 30-day break.
Among gisiguro nga sa school calendar karong tuiga, ang mga magtutudlo adunay 30 ka sunodsunod nga adlaw nga pahuway panahon sa break nga walay bisan unsang kalihokan sa DepEd nga nagkinahanglan og boluntaryong mga trabaho. Ang tanan nga mga aktibidad nga adunay boluntaryong pag-apil e-eskedyul pagkahuman sa 30 ka adlaw nga pahulay, pahayag ni Duterte.
Matud pa sa Kalihim sa DepEd nga ang End of School Year Rites naapil na sa opisyal nga school days sa kasamtangang school calendar.
Sa paghatag og gibug-aton sa mahinungdanong tahas sa mga magtutudlo, gipahibalo usab ni Duterte nga ilang tuyo nga madugangan ang benepisyo nga madawat sa mga magtutudlo.
Gidugang niini nga sa pagsusi ug paghatag og giya sa Department of Budget and Management (DBM) ug sa Civil Service Commission (CSC), nangayo ang ahensya og mas taas nga alokasyon alang sa paghatag og teaching overload pay.
Gipasalig ni Duterte ang pag-ila ug pagbayad sa mga magtutudlo alang sa ilang bililhon nga mga kontribusyon.
Ang DepEd nakigtambayayong usab sa DBM aron maaprobahan ang pagkuha sa 3,500 ka administrative officers ug 1,500 ka project development officers aron makatabang sa mga tunghaan.
Uban niini, sa dili madugay ang mga magtutudlo makuhaan sa mga responsibilidad sa pagdumala, mao nga ilang gitutokan ang pagpauswag sa pagkat-on sa mga estudyante.
Misaad usab ang kalihim sa DepEd nga hatagan og tabang ang mga magtutudlo alang sa ilang mga utang.
Giingong gitakdang lagdaan ang usa ka memorandum of agreement tali sa Government Service Insurance System (GSIS) alang sa usa ka exclusive lane alang sa mga magtutudlo ug usa ka designated team nga moatiman lamang sa mga transaksyon sa mga magtutudlo.
Dugang niini, ang DepEd sa dili madugay maglusad og website nga maghatag og libreng legal nga tabang alang sa mga magtutudlo alang sa ilang mga kontrata sa pautang.
Kalabot usab sa promosyon sa mga magtutudlo, gigarantiyahan ni Duterte ang usa ka sistema nga itumong alang niini.
“Wala nang palakasan. We are now developing an automated system for an objective selection in the hiring and promotion of teachers,” pasalig pa ni Duterte. (ECB/PIA7 Bohol)
