TAGBILARAN CITY, Bohol, August 30 (PIA) -- Pormal na nga gilusad ang labing una nga tunghaan sa pagka doctor, dinhi sa Bohol, nga pwede nga makapatinuod sa damgo sa mga kabus nga mamahimong mananambal.
Ang Bohol Island State University (BISU) School of Medicine (SOM), pormal nga gideklara nga buksan na, pinaagi ni Jo Mark Libre, ang Chairperson sa BISU Board of Trustees, Agosto 2, 2023.
Ang pagdeklara sa pagbukas sa ikaduha nga pangpubliko nga tunghaan sa pagka doctor sa Central Visayas, nahitabo usab human sa hamubo nga programa nga gitambongan usa sa mga tinugyanan sa Commission on Higher Education (CHED) ug sa Department of Health, lakip na usab sa mga representante sa Senate committees on Higher Education ug Finance, ug mga lokal officials pinangulohan ni Gobernador, Erico Aristotle Aumentado.
Namugna nga tunghaan isip pagtubag usab sa nagkadaku nga panginahanglan sa competent ug compassionate nga medical practitioner aron pakunhoron ang doctor to population ratio sa nasud, suplayan ang mga panginahanglan sa mga doctor nga taga dinhi na gayud ngadto na sa mga lungsod nga walay nangalagad sa panginahanglang medical alang sa sas sustenable nga pagsuporta sa Universal Health Care Act.
Ug pinaagi sa Doktor Para sa Bayan Program sa nasud, gibuksan sa kagamhanan ang 50 ka slots alang sa mga kabus nga pwede modawat sa state scholarship o sa local government scholarship aron maoy mosagubang sa galastohan sa pag-eskwela sa pagka mananambal.
Sa 50 ka slots nga gibuksan, 26 lamang ka slot ang nasudan, dala na usab sa kalisud sa mga estudyante sa pagtuman sa mga rekisitos aron madawat ngadto na sa Entrance alang sa Medical Aptitude Test ug makapasar niini.
Kon makatapos na ang usa ka estudyante sa pag-eskwela, obligado hinuon usab siya nga motrabaho og katumbas sa doble sa katas-on sa panahon nga iyang gigamit sa pag-eskwela, isip bayad sa iyang scholarship.
Matud ni Kongresista Edgar Chatto, kinsa maoy giisip nga amahan sa BISU SOM, ang katukoran sa SOM nahasubay sa tumong sa Bohol nga palig-onon ang sistema sa health care dinhi, gamit ang daghan nga potensyal nga mga Bol-anong may talent, aron suplayan og mga doctor ang mga itukod nga mga specialty health care centers ug hospitals, mga doctor nga dili mobiya sa Bohol, sama sa pait nga kasinati-an sa panahon sa pandemya.
Buot usab hinuon usab sa kagamhanan nga ang mga matag graduate sa kurso isip scholars, mahitapon na usab sa public health care system aron sila na ang magpalihok sa health care resolution paingon sa Universal Health Care
Kahinumduman nga niadtong Mayo 26, 2023, gipagawas sa CHED, kinsa nagkatapok en banc, ang resolusyon nga nagtugot sa BISU sa pagbukas sa kurso nga medisina. (RAHC/PIA7 Bohol)
