TAGBILARAN CITY, Bohol, October 17 (PIA) -- Isip suporta sa tinguha ni Presidente Ferdinand R. Marcos Jr. nga himuong mas barato ang suplay sa mga pagkaon sa tanang Pilipino, ilusad sa National Irrigation Administration (NIA) Central Visayas ang KADIWA sa NIA sa Oktubre 18.
Dungan kining ipahigayon sa NIA Regional Office 7 Compound sa barangay Dao ning syudad sa Tagbilaran, sa lungsod sa Pilar atbang sa NIA-Malinao Irrigation System, sa lungsod sa Ubay tapad sa NIA-Capayas Irrigation System Guardhouse, ug sa lungsod sa Talibon sa Barangay Balintawak.
Nagkalain-laing mga produkto sama sa lab-as nga mga utanon, isda, bugas ug uban pang mga produkto nga gikan sa mga Bol-anong mag-uuma ang mapalit sa mas ubos nga presyo ang mapalit sa KADIWA sa NIA.
Ipahigayon ang pormal nga paglusad ug programa sa NIA Regional Office 7 Compound sa barangay Dao ning syudad sa Tagbilaran sa alas 9 sa buntag sa Miyerkoles, Oktubre 18.
Ang Kadiwa nga programa usa ka farm-to-consumer market chain nga nagwagtang sa mga intermediary, nga nagtugot sa mga lokal nga prodyuser nga makamugna og mas taas nga kita pinaagi sa pagbaligya sa ilang produkto direkta ngadto sa mga konsumidor.
Ang paglusad sa KADIWA sa NIA subay sa direktiba ni NIA Acting Administrator Engr. Eddie G. Guillen sa paghatag sa kinasingkasing nga suporta sa nasangpit nga programa.
Ang lain-laing produkto sa Irrigators Associations (IA) mahimong mapalit sa ubos nga presyo sa mga Boholano.
Kini nga trabaho nagpamatuod nga ang NIA nagpabiling matinud-anon sa ilang pangandoy nga mapataas pa ang lebel sa panginabuhi sa mga Pilipinong mag-uuma pinaagi sa nagkalain-laing pamaagi nga makadugang sa ilang kita. (ECB/PIA7-Bohol)
Aron mahimong available ang mga baratong pagkaon, gihimo sa NIA-7 ang Kadiwa ni Ani at Kita pinaagi sa pagaghat sa ilang irrigators associations sa pagdala sa mga produce ngadto sa Kadiwa centers aron ikabaligya, sama sa gihimo sa ubang lugar (PIA Bohol)
