MANILA, October 11 (PIA) -- Gideklarar ni Presidente Ferdinand R. Marcos Jr. ang barangay ug Sangguniang Kabataan (SK) elections isip non-working holiday sa Pilipinas aron tugotan ang mga Filipino nga makabotar sa Oktubre 30.
“It is imperative that the people be given the full opportunity to participate in the said elections and exercise their right of suffrage (Kinahanglan nga ang katawhan mahatagan sa hingpit nga kahigayonan sa pag-apil sa nasangpit nga eleksyon ug paggamit sa ilang katungod sa pagboto),” si Presidente Marcos mipahayag ubos sa Proclamation No. 359, nga gilagdaan ni Executive Secretary Lucas P. Bersamin niadtong Oktubre 9.
Gitugotan sa Supreme Court (SC) ang Commission on Elections (Comelec) nga ipadayon ang pagpahigayon sa barangay ug SK eleksyon nga gitakda sa Oktubre 30, 2023, sumala sa gitakda kaniadto ubos sa Republic Act No. 11935.
Walay balaod nga naghimo sa adlaw sa eleksyon sa Pilipinas nga usa ka automatic holiday, mao nga ang mga presidente kinahanglang magpagawas og proklamasyon.
Ang sunod nga hugna sa barangay elections ipahigayon unta niadtong Mayo 2020 apan gi-postpone sa Disyembre 2022, ug gibalhin na usab ngadto sa Oktubre 2023.
Mokabat sa 67.8 milyones ka tawo ang gitakdang mobotar alang sa barangay elections, samtang 23.2 milyones ka tawo ang narehistro nga moapil sa Sangguniang Kabataan eleksyon.
Samtang nikabat sa 1.41 ka milyon ang niduso sa ilang kandidatura alang sa umaabot nga eleksyon, sa paglaom nga mapun-an ang 672,432 ka mga pwesto ang nakatagana. (ECB/PIA7-Bohol)
