TAGBILARAN CITY, Bohol, May 22 (PIA) -- Gimando sa Office of the President (OP) ang pag-reorganisa sa Inter-Agency Task Force on Zero Hunger.

Nakalatid sa Executive Order 27 nga gilagdaan ni Executive Secretary Lucas Bersamin, nga gi-petsahan og Mayo 18 ug gipagawas niadtong Domingo ang Task Force on Zero Hunger nga pangunahan sa Kalihim sa Department of Social Welfare and Development (DSWD chairperson) ug National Council executive director (co-chairperson).

Molingkod si Presidente Ferdinand R. Marcos Jr., nga kasamtangang Kalihim sa Department of Agriculture (DA) isip vice chairperson sa task force.

Samtang mahimong parte usab ang Kalihim sa Department of Education (DepEd) Bise Presidente Sara Duterte-Carpio isip miyembro sa task force.

Ang ubang miyembro naglakip sa mga Kalihim sa Department of Agrarian Reform (DAR), Department of Budget and Management (DBM), Department of Environment and Natural Resources (DENR), Department of Labor and Employment (DOLE), Department of Trade and Industry (DTI), Department of Science and Technology (DOST), ug National Economic and Development Authority (NEDA).

Kauban sa mahimong miyembro sa task force ang chairperson sa National Economic and Development Authority (NEDA) ug tinugyanan gikan sa Office of the President (OP).

Matud pa sa EO, ang task force gipangunahan kaniadto sa Office of the Cabinet Secretariat (OCS) apan ang katungdanan niini gibalhin sa Presidential Management Staff (PMS) ubos sa EO 11, nga gipagawas niadtong 2022.

Human sa pagkabungkag sa OCS sa susamang tuig, nakalatid sa EO 27 nga adunay  panginahanglan nga amyendahan ang EO 101. (ECB/PIA7 Bohol)