TAGBILARAN CITY, Bohol, June 6 (PIA) -- Gi-aprobahan ni Presidente Ferdinand R. Marcos Jr. niadtong Martes ang gisugyot nga Philippine Export Development Plan (PEDP) 2023 hangtod 2028 nga gitumong sa pagpahimulos sa mga oportunidad sa pagtubo sa eksport taliwala sa karon nga mga uso sa merkado, pagpalambo sa mga lokal nga industriya, ug paghimo sa Pilipinas nga usa ka global nga player sa mga eksport.

Sa usa ka press briefing sa Malacañang, si Department of Trade and Industry (DTI) Kalihim Alfredo Pascual miingon nga ang gisugyot nga Export Development Plan nga giumol sa Department of Trade and Industry (DTI) subay sa Export Development Act of 1994 naghubit sa export thrusts, mga estratehiya, mga programa ug mga proyekto sa nasud.

Matud pa ni Pascual nga ang ilang proposal subay gayud sa Philippine Development Plan nga una nang gipagawas sa administrasyon. Kini nga plano sa pagpalambo sa pag-eksport magpahimulos sa mga oportunidad sa pagtubo sa eksport nga gikonsiderar ang mga uso sa merkado ug ang anaa o kasamtangan nga mga kahanas sa Pilipinas sa atong mga industriya.

Gidugang niini nga kini nagtinguha sa paghimo sa usa ka industry development-centric nga pamaagi aron ang Pilipinas mahimong nag-una nga magdudula sa global nga ekonomiya ug makab-ot ang malungtarong mga tumong sa kalamboan.

Ang Presidente gilauman nga molagda sa usa ka Memorandum Circular nga magpasabot ug magtudlo sa nagkalain-laing ahensya sa ilang tagsa-tagsa ka mga tahas sa PEDP sa paghimo sa usa ka whole-of-government approach sa pagpatuman sa programa.

Sa laing bahin, gihimug-atan ni Pascual nga sa dili pa maka-eksport ang Pilipinas, kinahanglan kini nga moprodyus.

Matod niya ang unang hagit mao ang pagtabang sa mga industriya nga makagama og mga produkto nga makakompetensya sa merkado.

Si Pascual nagkanayon nga ang export plan naglatid sa tulo ka estratehikong aksyon aron mapalambo ang export clusters: pagtubag sa mga limitasyon sa produksiyon; pagpalambo sa usa ka lig-on nga bag-ong export ecosystem; ug pagdugang sa mindshare sa Pilipinas sa global market.

Siya miingon nga ang DTI miila usab ug upat ka priority industry clusters subay sa Philippine Development Plan.

Kini nga mga cluster naglakip sa industriyal nga makinarya ug transportasyon; teknolohiya, media ug telekomunikasyon; siyensya sa panglawas ug kinabuhi; ug, moderno nga batakang panginahanglan sa usa ka lig-on nga ekonomiya.

Aron maparehas ang Pilipinas sa ubang kanasuran bahin sa sektor sa eksport, ang Kalihim sa DTI miingon nga kinahanglang atubangon sa gobyerno ang pinakahuyang nga punto niining dapita pinaagi sa pagpalambo sa manpower sa nasud ug pinaagi sa pagpauswag sa gidaghanon ug kalidad sa mga produkto nga ma-eksport. (ECB/PIA7 Bohol)