MANILA, September 19 (PIA) -- Mas hingusgan karon sa Presidential Communication Office (PCO) ang ilang kampanya batok sa fake news.
Si PCO Kalihim Cheloy Garafil niingon nga adto sila magpahigayon og kampanya batok sa fake news sa mga tunghaan aron ipasiugda ang pakigbatok sa pagkuyanap sa fake news.
Tuyo sa nasangpit nga programa nga matudloan ang kabataan sa kamahinungdanon sa pagbaton sa saktong impormasyon.
Sa Senate Finance Committee hearing niadtong Lunes, si PCO Undersecretary Emerald Ridao niingon nga ilang gibasehan ang ilang umaabot nga programa sa resulta sa ilang gipahigayon nga survey nga nag-ingon nga “9 out 10” nga mga tawo ang vulnerable sa “fake news.”
Sa nasangpit nga survey, ang mga batan-on ang giingong labing huyang, matud ni Ridao.
Ang mayoriya sa peke nga impormasyon nga ilang nadawat, matod ni Garafil, nagbiktima sa mga programa sa gobyerno sama niadtong naglambigit sa Department of Social Welfare and Development (DSWD), ug mga nailhang personalidad.
Matud pa ni Garafil nga ang paghatag og factual information bahin sa West Philippine Sea, kabahin usab sa ilang adbokasiya.
Sa miaging buwan gilusad sa PCO ang Media Information Literacy Campaign nga magtudlo sa mga batan-on ug eskwelahan sa pagsumpo sa fake news. (ECB/PIA7-Bohol)
