TAGBILARAN CITY, Bohol, October 5 (PIA) -- Gideklarar ni Presidente Ferdinand Marcos Jr. ang buwan sa Oktubre isip Cybersecurity Awareness Month.
Gikan sa Setyembre matag tuig, gibalhin ni Presidente Marcos sa buwan sa Oktubre aron madungan sa internasyonal nga kalihokan.
Una niini, ang Official Gazette nagpagawas og kopya sa Proclamation No. 353 niadtong Oktubre 4. Gilagdaan kini ni Executive Secretary Lucas Bersamin niadtong Oktubre 2.
Giila sa Presidente ang panginahanglan nga usbon ang orihinal nga Proclamation No. 2054 nga gi-isyu niadtong 2010.
“In order to synchronize the Philippines with the international observance of the ‘Cybersecurity Awareness Month’ in October and to further signify the country’s unwavering commitment towards a unified approach in the digital era of governance, there is a need to amend Proclamation No. 2054,” matud pa sa Pangulo.
Tungod niini, gitahasan sa Pangulo ang Department of Information and Communications Technology (DICT) nga manguna sa pagsaulog sa Cybersecurity Awareness Month ug pag-ila sa mga programa, proyekto ug aktibidad nga susama sa international best practices alang sa tinuig nga selebrasyon.
Gitahasan usab niini ang tanang buhatan sa nasudnong kagamhanan ug gidasig ang mga local government units, non-government organizations, ug pribadong sektor sa pagsuporta sa DICT pinaagi sa aktibong pag-apil sa tinuig nga obserbasyon.
Ang Cybersecurity Awareness Month nagtumong sa pagpalig-on sa mga paningkamot aron matubag ang estratehikong polisiya sa mga dimensyon sa cybersecurity, pagpalambo sa usa ka nasudnong cyber defense nga kapabilidad, ug paghimo sa publiko nga kahibalo pinaagi sa gipakusog nga mga kampanya nga nagpakita sa cybersecurity nga impormasyon. (ECB/PIA7 Bohol)
