SYUDAD SANG ILOILO (PIA) -- Ginapanagawan sang Presidential Communications Office (PCO) ang mga bumulutho sa kolehiyo nga magpasakop sa kompetisyon sang pagsulat sang salaysay nga naangot sa tema nga “Bagong Pilipinas” nga kampanya sa karon nga administrasyon.

Suno sa PCO, ang ini nga kompetisyon ang kabahin sang Communications Month nga ginasaulog sa bulan sang Oktubre sa idalom sang Proclamation No. 308 nga ginlagdaan ni Presidente Ferdinand R. Marcos Jr.

Sa mga luyag nga magpakigbahin sang ini nga paindis-indis, mahimo nga magsumiter sang salaysay asta sa Nobyembre 20, indi maglapaw sa 5:00 PM.

“Bagong Pilipinas is the theme. The piece may touch on: 1) the Filipino youth’s aspirations for a Bagong Pilipinas, or (2) the inspirational spirit that will enable this call-to-action realization, among many other narratives the writer wants to communicate,” pahayag sang PCO.

May yara sang mga regional nga mga tagdaug nga magabaton sang padya nga  P10,000 para sa ikatatlo nga pwesto; P30,000 para sa nagapangaduha; kag P50,000 sa nahauna nga pwesto.

Sa pihak nga bahin, may yara naman sang lima ka mga tagdaug para sa national level nga magabaton sang P10,000 para sa ikalima nga pwesto; P30,000 para sa ikaapat; P50,000 para sa ikatatlo; P75,000 para sa ikaduha; kag P100,000 para sa nahauna nga tagdaug.  (AAL/LMLE/PIA Iloilo/PND)