TAGBILARAN CITY, Bohol, October 20 (PIA) -- Nipagawas ang Malacañang og Memorandum Circular (MC) No. 37 niadtong Lunes, nga nagmando sa dinalian nga pagpatuman sa National Anti-Money Laundering, Counter-Terrorism Financing ug Counter-Proliferation Financing Strategy 2023-2027 sa gobyerno ug nanawagan sa mga hingtungdang ahensya nga suportahan ang mga paningkamot sa pagpakigbatok sa money laundering ug terrorism financing risk assessment.
Ang memorandum nga gilagdaan ni Executive Secretary Lucas Bersamin, gitahasan usab ang tanang mga hepe sa ahensya sa pagrepaso ug pag-assess sa ilang mga deliverable ubos sa ICRG Action Plan, pag-assign sa mga focal person aron makompleto ang deliverables sa Nobyembre 30, 2023, ug magtukod og mekanismo sa pagmonitor sa pag-uswag sa matag deliverable.
Ang National AML/CFT Coordinating Committee (NACC) Secretariat gimandoan sa paghatag sa tanang hingtungdan nga mga ahensya sa tagsa-tagsa ka mga deliverables ug mga target sa opisina ubos sa International Co-operation Review Group (ICRG) Action Plans ug uban pang may kalabotan nga mga dokumento lakip na ang may kalabotan nga mga resolusyon sa NACC.
Ang memorandum nagmando usab sa AMLC sa pagsumite sa opisina sa Executive Secretary, pinaagi sa Office of the Deputy Executive Secretary for Legal Affairs, og usa ka komprehensibo nga taho sa kahimtang sa pagpatuman sa NACS 2023-2027, labi na ang Strategic Objective 1, sa dili pa ang Disyembre 8, 2023.
Ang AMLC magsilbi usab nga nanguna nga ahensya sa ML/TF NRA Working Group ug maghimo ug mag-isyu og mga giya alang sa epektibong pagpatuman sa sirkular.
Mahimo usab nga tawagan sa konseho ang departamento sa gobyerno, ahensya, apil ang mga GOCC ug imbitahon usab ang mga LGU ug pribadong sektor nga maghatag tabang sa pagkab-ot sa mga katuyoan niini ubos sa kasamtangang mga balaod ug lagda.
Ang implementasyon sa memorandum circular pagapundohan pinaagi sa tagsa-tagsa ka gahin sa mga hingtungdang ahensya sa gobyerno ug sa corporate operating budgets sa mga hingtungdang GOCCs. (ECB/PIA7-Bohol)
