SYUDAD SANG ROXAS, Capiz (PIA) -- Nagbaton sang P5,000.00 nga bulig pinansyal ang kada isa sa 2,000 ka mga kwalipikado nga mga estudyante sang Capiz State University (CapSU) bilang educational assistance sang nagligad nga semana sa Dadivas Auditorium sang CapSU – main campus diri sa syudad sang Roxas.

Ang pagpanagtag sang educational assistance ginpangunahan sang tiglawas ni  Senador Imee R. Marcos  nga si direktor Eliza Romualdez-Valtos sang Marcos Presidential Center. 

Mahibal-an nga si Marcos isa sa mga may dalagko nga kontribusyon sa pagpatuman sang AICS nga programa.

Nagtambong man sanday Dr. Editha C. Alfon nga presidente sang CapSU, Deputy Provincial Administrator para sa nahauna nga distrito sang probinsya nga si Enrique Martin, vice-mayor Teresa Almalbis sang Roxas City, kag iban pa.

Matandaan nga masobra man sa 5,000 ka mga kwalipikado nga estudyante sa probinsya ang nagbaton sang educational assistance sang DSWD sang nagligad nga tuig 2022 sa ginpatigayon nga payout tagsa ka semana sa may Villareal Stadium diri sa Roxas City kag iban pa nga mga lugar sa natumod nga mga kabanwahanan. (AGP/AAL/PIA Capiz)