PAGADIAN CITY, Aug 26 (PIA)— Ang Presidential Communications Operations’ Office (PCOO) aktibo nga naglunsad sa ‘Duterte Legacy’ campaign aron mapahibalo sa mga katawhan ang mga nahimo ni Presidente Rodrigo Duterte sulod sa iyang unom ka tuig nga pangatungdanan.

Kini maoy gipadayag ni PCOO Secretary Martin Andanar sa radio interview ni Cristie Basadre, news anchor sa DXMG Radyo Bisdak sa lungsod sa Ipil, Zamboanga Sibugay ning adlaw sa Huwebes. 

Matud pa ni Andanar nga sugod sa Duterte Administration, aktibo kaayo ang PCOO paglibot sa tibuok Pilipinas aron mapahibalo sa mga katawhan ang mga kalampusan nga nahimo sa kagamhanan.

Gidugang pa ni Andanar  nga ang PCOO nakighiusa usab sa mga local radio stations sa Mindanao aron mapahibalo ngadto sa mga katawhan ang mga proyekto nga nahimo sa administrasyon ni Presidente Durterte.

Dugang pa ni Andanar nga aktibo usab kaayo ang PCOO nga nakighiusa sa mga national government agencies nga nanginahanglan ug tabang sa ilang ahensya.

Gitagsa-tagsa ug pahibalo ni Andanar ang mga infrastructure ug  social development projects nga napahimuslan sa kadaghan sa mga katawhan sa tibuok nasud.

Samtang, gipasalamatan ni Basadre ang PCOO nga nakig-interact sa mga radio stations tugod kay kini ang mahinungdanon kaayo nga mapahibalo sa ilang mga suking tigpaminaw ang mga nahimong programa ug proyekto sa presidente sa dili pa mahuman ang iyang term of office sa 2022. (RVC/EDT/GCC/PIA-Zamboanga del Sur)